मंगलबार, २६ असार, २०८०,

काठमाडौं,

मनाङ एयरको हेलिकप्टर दुर्घटनामा हेलिकप्टरमा सवार ६ जनाकै मृत्यु भएको छ ।

मंगलबार बिहान १० बजे सोलुखुम्बुबाट काठमाडौंका लागि उडेको मनाङ एयरको ‘एनए–एमभी’ कलसाइनको हेलिकप्टर सोलुखुम्बुको लिखुपिके गाउँपालिका–५ स्थित लाम्जुरापास क्षेत्रमा दुर्घटना भएको हो ।

दुर्घटनामा परी ६ जनाकै मृत्यु भएको कोशी प्रदेश प्रहरी कार्यालयका प्रमुख डिआइजी राजेशनाथ बास्तोलाले जानकारी दिए ।
हेलिकप्टरमा सवार यात्रुहरू पाँचै जना मेक्सिकन नागरिक थिए भने हेलिकप्टर पाइलट चेतबहादुर गुरूङले उडाएका थिए

घटनास्थलमा नेपाल प्रहरीका असई निराजन बस्नेतको टोली पुगेको छ । उनी मोटरसाइकलमा घटनास्थलमा पुगेका हुन् । शवहरू जलेको अवस्थामा रहेको, एक जनाको शव टुक्राटुक्रा भेटिएको र शव संकलन गर्ने काम भइरहेको प्रहरीले जनाएको छ ।
हेलिकप्टर रूखमा ठोक्किएर दुर्घटनामा परेको प्रहरीले अनुमान लगाएको छ ।

बिहान १० बजे सोलुखुम्बुको सुर्केबाट उडेको हेलिकप्टर सवा १० बजे सम्पर्कविहीन भएको थियो । उक्त हेलिकप्टर पौने ११ बजे काठमाडौं आइपुग्नुपर्ने थियो । तर सम्पर्कविहीन भएको खबर पाएपछि प्रहरीको टोली परिचालन गरिएको थियो ।

घटनास्थलमा जिल्ला प्रहरी कार्यालय सोलुखुम्बुका डिएसपी दिपक श्रेष्ठ र नेपाली सेनाको टोलीसमेत गइरहेको छ ।