भारतका प्रधानमन्त्री नरेन्द्र मोदीले अर्को साता रुसको भ्रमण गर्ने भएका छन् । भारतीय सञ्चारमाध्यमहरुका अनुसार मोदीले जुलाई ८ मा रुसको भ्रमण गर्ने बताएका छन् ।

यद्यपी दुवै मुलुकले भ्रमणको आधिकारिक मिति भने सार्वजनिक गरेका छैनन् । रुसी राष्ट्रपति भवन क्रेमलिनका प्रवक्ता दिमित्री पेस्कोभले भारतीय प्रधानमन्त्री मोदीको भ्रमणको पुष्टि गर्दै मिति छिट्टै घोषणा गरिने उल्लेख गरेका छन् । उनले मोदीको रुस भ्रमणको तयारी भने लगभग सकिएको बताए ।

क्रेमलिनले क्षेत्रीय र विश्वव्यापी सुरक्षा, व्यापार जस्ता एजेन्डामा वार्ता गर्ने तयारी गरेको छ । राष्ट्रपति भ्लादिमिर पुटिन र भारतीय प्रधानमन्त्री मोदीको मस्कोमा भेट हुँदा दुवैबीच औपचारिक वार्ता हुने बताइएको छ ।

रुस र भारतको दुईपक्षीय हित अनुकुल हुने गरि संयुक्त आयोजनाका विषयमा छलफल हुने पेस्कोभले बताए । रुसले क्षेत्रीय मामिला, क्षेत्रीय सुरक्षा र विश्वव्यापी सुरक्षालाई मुख्य एजेन्डाको बनाएको छ ।