नेपालको जलविद्युत क्षेत्रमा लगानी भित्राउनको लागि भारतमा ‘पावर समिट, २०२४’ आयोजना हुने भएको छ । लगानी सम्मेलनको पूर्वसन्ध्यामा भारतीय लगानीकर्तालाई आकर्षित गर्न भारतस्थित नेपाली दूतावासले समिट आयोजना गर्ने भएको हो । दूतावासले भारतको ‘इन्डिया फेडेरेसन अफ ग्रीन इनर्जी’ सँगको सहकार्यमा यो सम्मेलन गर्नेछ ।

नेपाली दूतावासको आयोजनामा हुने सो सम्मेलनमा नेपालसहित भारतका उद्यमी सहभागी हुने अपेक्षा गरिएको छ । यही चैत २९ गते हुने सम्मेलनमा सहभागीताका लागि नेपालबाट स्वतन्त्र जलविद्युत उत्पादकहरूको संस्था (इप्पान)को टोली नै दिल्ली जाँदैछ । यही वैशाख १६ र १७ गते हुने लगानी सम्मेलनमा भारतीय लगानीकर्ता आकर्षित गर्ने लक्ष्य रहेको छ ।

सम्मेलनमा सो फेडेरेसनका प्रतिनिधिहरूको समेत उपस्थिति हुनेछ । अदानी गु्रप, उत्तर भारत हाइड्रोपावर, केयर रेटिङ लिमिटेड, लगानी बोर्ड नेपाल, इप्पान, नेपालका राजदूत, नेपाल र भारतका ऊर्जा सचिवको समेत सहभागिता रहनेछ ।

नेपालमा भारतीय लगानीको धेरै आयोजनाहरू निर्माणाधीन चरणमा छन् । भारतीय लगानीसहितको अरुण तेस्रो जलविद्युत आयोजनाको भौतिक प्रगति ७० प्रतिशतभन्दा धेरै छ । यस्तै पश्चिम सेती अरुण चौथो लगायतका आयोजनामा समेत भारतीय लगानीकर्ता छन् । यसबाहेक, कयौँ आयोजनामा भारतीय लगानी छ ।

यसबाहेक नेपालमा उत्पादित बिजुलीको प्रमुख बजार समेत भारत हो । चालू आर्थिक वर्षको सुख्खायाममा नेपालबाट भारततर्फ साढे ६०० मेगावाट बिजुली निर्यात भएको थियो । जसबाट नेपाल विद्युत् प्राधिकरणले सुख्खायामको अवधिमा साढे १५ अर्बभन्दा बढी विदेशी मुद्रा आर्जन गरेको थियो ।

यसबाहेक नेपाल र भारतबिच १० वर्षमा १० हजार मेगावाट बिजुली निर्यातको सम्झौता सम्पन्न भइसकेको छ । यससँगै आगामी आर्थिक वर्षदेखि नेपालबाट निर्बाध रूपमा खपतबाट बढी हुने बिजुली निर्यात हुनेछ ।